نيجي لتاني نقطة في الأفكار اللي لو اتغيرت من عقلنا هنبتدي صح وهي فترة الخطوبة .. الكل راجل وبنت بيبقوا داخلين على فترة الخطوبة بأنها أسعد فترة في حياتهم وأنها كلها حب وغرام وعشق وان المشاكل لما تحصل لو ماتحلتش بالطريقة اللي بنشوفها في الأفلام والتضحية والمحايلة والتقل على الطرف التاني "كل الحاجات اللي بتبوظ علاقات كانت ممكن تكون من أنجح العلاقات" لو محصلش كل ده يبقى لأ ده مابيحبنيش
لكن فترة الخطوبة مش أسعد فترة في حياة المقبلين على الزواج لكنها فعلا أهم فترة هي اللي بتحدد استمرار الزواج بسعادة أو تعاسة أو لا قدر الله حصول الطلاق
عشان كده أنا مش هجمل الكلام في الكلام عن الفترة دي لأن اللي ببيقرا كلامي عايز يستفيد بجد عايز الصح، هتستفيد ايه لما تعيش قصة حب ما أروعها قصة فترة الخطوبة وبمجرد الزواج وتبقوا في بيت واحد يحصل الفتور ويحصل الصمت الزواجي وتبتدي الخلافات وتقولوا على الحب يا رحمن يارحيم ويرجع الناس تقول بلاش جواز والجواز يدخل من الباب ينط الحب من الشباك وكل الكلام اللي يوجع القلب ده
الخطوبة فترة اختبار وكل راجل وكل بنت بيقروا الكلام ده لو تقبل فكرة انها فترة اختبار هتفرق كتير محدش منكم يزعل لما يلاقي التاني بيختبره أنا أعرف ان الموضوع مش سهل تقبله في الأول، لأن الفكرة الأساسية بتقول: "بيختبرني هو/هي مش واثق/ة فيا لأ دي اهانة مقبلهاش أبدا" طيب أنا هسأل سؤال هو ينفع حد يثق في حد من غير ما يعرفه كويس ولما يعرفه يبتدي يختبر الحاجة دي موجودة فعلا ولا تجمل وخلاص، ما هي المشكلة بتيجي من هنا اتنين يحبوا بعض ويتخطبوا يدوا الثقة للآخر وتبتدي التوقعات تشتغل وأول ما يحصل حاجة ضد التوقع تلاقي: "ازاي قدر يعمل كده دي آخر حاجة كنت أتوقعها منه/ها"
اتنين من بيتين مختلفين من تعليم مختلف من محيط اجتماعي مختلف من خبرات وأفكار وطباع مختلفة ازاي هيعرفوا كل حاجة المفروض تتعمل وترضي شريك الحياة هنلاقي ناس تقول فيه بديهيات لازم تبقى معروفة هي مش كيميا، البديهيات اللي بتتكلم عنها دي بديهيات الأفلام، الحب بيصنع التوافق مش بيصنع التطابق فرق كبير بين الاتنين!
الخطوبة فترة تخطيط مش فترة فسح وهدايا وخلاص تخطيط لكل حاجة لطريقة التعامل لحل المشاكل للمسئوليات تخطيط حتى لفترات الفتور في الحب بعد الزواج تخطيط للأبناء وتربيتهم وكل حاجة والتخطيط ده بيبقى متواصل ومستمر وقابل للتعديل حتى آخر العمر كل وقت ليه خطة، وموضوع التخطيط ده هنتكلم فيه بالتفصيل ان شاء الله مرة تانية
لو قدرتوا فعلا تغيروا فكرتكوا عن فترة الخطوبة وتعرفوا إنها فترة
1- تعارف
2- اختبار
3- تخطيط
هتفرق جدا ... الصدمات العاطفية والعقد النفسية من الجواز وتذبذب الثقة في النفس والآخرين وعدم الرغبة في الارتباط كل ده مش هيبقى ليه وجود، مش معنى ده ان مش هيبقى فيه حزن على العاطفة اللي كانت للخطيب/ة لكن هيبقى فيه اقتناع ان الموضوع مفيهوش ظالم ومظلوم وان الموضوع كله عدم توافق مش أكتر، هتقل اوي الكلمة المشهورة اللي بنسمعها: "كان بيخدعني" سواء من الراجل أو من البنت
ولو دي اتغيرت الموضوع هيبقى أسهل جدا في تغيير الفكرة عن فسخ الخطوبة واللي هي النقطة التالتة في الأفكار المسبقة عن الزواج واللي هنتكلم عليها المرة الجاية بإذن الله
بقلم
أميـــــــــ محمد ــــــــــرة
لو حبيت تشاركنا برأيك في ازاي المفروض تكون فترة الخطوبة وايه الصح
انتظروا جديدنا
ليست هناك تعليقات:
إرسال تعليق