اخترت أتكلم باللغة العامية في الموضوع ده لأن يهمني الفكرة توصل لكل الناس بطريقة مبسطة
والأفكار منتشرة جامد في ثقافتنا المصرية خاصة وأتمنى لو نقدر نغيرها سوا
قبل ما نتكلم عن اختيار شريك الحياة في حاجة مهمة لازم نتكلم عنها وهي "الأفكار المسبقة عن الزواج" فيه أفكار كتير في عقلنا عشان نقدر نبتدي صح لازم نغيرها زي ايه الأفكار دي:
والأفكار منتشرة جامد في ثقافتنا المصرية خاصة وأتمنى لو نقدر نغيرها سوا
قبل ما نتكلم عن اختيار شريك الحياة في حاجة مهمة لازم نتكلم عنها وهي "الأفكار المسبقة عن الزواج" فيه أفكار كتير في عقلنا عشان نقدر نبتدي صح لازم نغيرها زي ايه الأفكار دي:
1- استمداد الثقة من شريك الحياة
2- فترة الخطوبة
3- فسخ الخطوبة
وأول نقطة وآخر نقطة المتزوجين كمان يقدروا يغيروها حياتهم هتفرق جدا بإذن الله
لو هنتكلم على أول نقطة وهي استمداد الثقة من شريك الحياة أكبر غلطة بيقع فيها المقبلين على الزواج أو المتزوجين انهم بيربطوا سعادتهم وثقتهم بنفسهم من رضا وثقة شريك حياتهم فيهم وده سر التعاسة فعلا
لأن طول ما انت مستني رضا الشريك عنك وعن تصرفاتك وعن صفاتك ومواهبك مش هتبقى انت هتغير كل حاجة جواك وكل حاجة عن نفسك وهتبقى "عايش دور مش دورك" ومن الآخر برضو مش هيرضى عنك، ومش معنى اني بقولك مترضيش شريك حياتك انك تتصرف من غير ماتراعيه لأ الفكرة انك وانت بتراضيه تكون نفسك مش تغير شخصيتك كلها عشان ترضيه خصوصا لو انت مقبل على الزواج لازم تدور على اللي يقبل بشخصك مش يغيرك ولو انت متزوج حاول على قد ما تقدر تبقى شخصيتك الحقيقية وتتفاهم مع شريك حياتك والجزء ده للمتزوجين هنتكلم فيه بالتفصيل مرة تانية
طبعا انتوا عايزين مثال عن معنى تكون شخصيتك وبرضو ترضي شريك حياتك أقولكم مثلا لو انت متعود تتعامل مع قرايبك بطريقة وجه شريك حياتك مضايق من الطريقة دي وقالك لو مغيرتش الطريقة دي هضايق هسيبك أو بيتخانق معاك على طول .. لو انت بتراعي مشاعره في التعامل وفعلا بتحترم وجوده في حياتك وفهمته أكتر من مرة لكنه بيطلب انك متتعاملش اساسا أو بيطلب انك تبعد عنهم يبقى كده بيحاول يغير من طبعك متوافقش اتفاهم معاه مرة واتنين وتلاتة لو ماحصلش اتفاق وانت بعد كده وافقت على كده هتبقى مبسوط فترة ولو حتى طالت هيجي عليك وقت تحس انك مش انت انك بتعمل حاجة مغصوب عليها أو بلغة صريحة أكتر ملوي دراعك فيها والدليل على كده بنشوف كتير مخطوبين لما بيسيبوا بعض بيعملوا كل الحاجات اللي كانوا بطلوها لأنهم بطلوها عن غير اقتناع عشان كده لازم تكون واثق في نفسك وفي طبعك وفي تربيتك متسمحش لحد من برة يجي يغيرلك كل ده عشان تعجبه ويرضى عنك ويتجوزك لأ لأ لأ
اللي هيتجوزك يتجوزك عشان شخصيتك وطبعك وتربيتك عجبته مش بس شكلك ومواصفاتك والباقي هو يغيره على مزاجه
الموضوع ده محتاج انك تكون عارف نفسك كويس وفي نفس الوقت تكون واثق انك كده حلو ولو عايز تغير نفسك للأحسن يبقى انت اللي تبقى عايز وتتغير من جواك مش حد يجي يغيرك مش معنى كده انك متقبلش مساعدة الناس انك تبقى أحسن لكن اسمعهم واعقلها اقتنعت اتغير مقتنعتش كمل الناس اللي بتساعدك مابتجبركش بتنصحك مرة واتنين وعشرة عشان خاطر بتحبك لكن اللي هيجبرك عشان هو يكون مبسوط .............. معتقدش هتقبلها !
النقطة التانية اللي هي فترة الخطوبة مهمة جدا ودي اللي بتحدد الزواج هيستمر ولا الطلاق لا قدر الله هيحصل من أول سنة ودي هنتكلم فيها المرة الجاية
بقلم
أميـــــــ محمد ــــــــــرة
شاركنا برأيك وبأسئلتك في موضوع الثقة وانت شايف ايه الصح انك تعتمد على رأي شريك حياتك فيك ولا على ثقتك بنفسك
كلية الزواج السعيد
انتظروا جديدنا
ليست هناك تعليقات:
إرسال تعليق